Ua toe lua nei vaiaso ona amata lesitala lea o suafa o ni tamaitai talavou o le atunuu e fia auai i le tauvaga, o le a saili ai se sui o Samoa e auai i le sailiga o se tausala o le lalolagi le Miss Global o le a faia i le atunuu o Vietnam i le masina o Novema o le tausaga nei.
O le kamupani telefoni o le Vodafone o loo faalauiloaina lenei tauvaga i lana upega tafailagi ma le fuafuaga o le a vaaia ma faatautaia le tauvaga e le Manaia Events o se auaunaga tuma’oti sa ia faatautaia le tauvaga o le sailia o se Tausala o Samoa i tausaga ua tuanai.
O le tauvaga e saili ai se tamaitai o le atunuu mo le tauvaga o se tausala o le kelope ua faaigoaina o le Miss Global Samoa.
O le autu o le tauvaga lenei e pei ona faailoa i faasalalauga faalauiloa, o se avanoa mo tamaitai e faaali ai ona lagona ma faamatala ona agavaa o tomai ma taleni i le lalolagi, e avea ma avanoa lelei e faalauiloa ai ma Samoa.
E lei faailoaina le aso ma le masina o le a faia ai lenei tauvaga, ae e pei ona silafia ua toe nei o le masina fou o Aukuso ona faia lea o le tauvaga o le sailia o se Tausala o Samoa lea e faia i le vaiaso muamua o le masina o Setema.
