Ua toe faamautū atili mai e le pulega o le kamupani vaalele o le Samoa Airways le faatāua o le puipuiga o le saogalemu i lana auaunaga ma le tautua aemaise o le tāua o aga ma amio tausili o lana aufaigaluega auā le ofoina o le auaunaga i le atunuu lautele e pei ona māfua ai lana polokalame na amata i le tausaga ua mavae, o le faia o su’ega poo test a alii ma tama’ita’i o galulue i le kamupani vaalele a Samoa e faamautū ai e lē o faaaogā pe tagofia e i latou soo se ituaiga o fualaau faasāina poo nakoti.
Ua faaalia e le Ofisa Sili o le pulega o le Samoa Airways le afioga Fauo’o Tauā Fatu Tielu i le pepa o faamatalaga mai le kamupani, o le itu tāua lea i le faamuamua o le saogalemu o le aufaigaluega ina ia mautinoa ia ogatasi ma le tautua o loo latou ofoina atu.
Ua faailoa ai e le Samoa Airways o le a faaauau pea lana polokalame i le silasila mamao e faamuamua le saogalemu o lana auaunaga mo tagata lautele aemaise o le atunuu femalagaa’i i le kamupani vaalele.
Ua faailoa lautele lea finagalo o le Ofisa Sili ma le pulega o le Samoa Airways ua lagolago ai i taumafaiga uma o loo faatino e faaitiitia ai le tulaga maualuga ua iai solitulafono o le umia ma le tagofia o fualaau faasāina aemaise le ‘aisa ua lē gata ina molia ai le itupa o alii ae faapea foi i le itupa o tama’ita’i.
