O ananafi lea na feiloai ai le Tamaitai Palemia faapea le Kapeneta i le Tausala o Samoa ma le Pasefika ia Moemoana Safaato’a Schwenke.
O le saunoaga faafetai a le Tamaitai Palemia na ave ai le faamalo i le tapenaga ma le tauaveina o le atunuu i le tauvaga sa feagai ai, sa faia i le mamalu ma le matagofie, ma faailoa foi le sao tāua o ē na tapenaina e pei o le Pulega o Tagata Tafafao mai Fafo, o le Onomea Production, o le tapuaiga a le atunuu aemaise lava i ona mātua sa aiaiuli ai.
O le po o le Aso Lua na taunuu mai ai le faigamalaga mai Nauru, ma o le Sui Palemia le afioga ia Tuala Tevaga Ponifasio sa auai e fai ma sui o le malo o Samoa i lea faamoemoe o le Tausala o le atunuu.
