O le lona 6 lenei o le Life-Con Pacific o se faaaliga o laei eseese mai nisi o pisinisi i le atunuu ma le Pasefika ae o se taimi muamua lenei ua auai se tasi o pisinisi mai Amerika Samoa, le Lagaali Atelier e faalauiloa ana tapenaga mo lenei faaaliga.

O le Lagaali Atelier o se pisinisi na faavaeina e se tasi o tamaitai ia Isabella Ah-Mu Mageo mai Amerika Samoa e pei ona ta’ua e se se tasi o sui o lenei pisinisi ia Leia Tasi. 

“O lo’u tausoga na amata ona ia faia lenei taleni o teuga eseese i laei i lona aiga o Aua i le 2016 ae faatoa uluai avea ma pisinisi i le tausaga ua mavae.

“O lona mafaufau o metotia e fau ma tuufaatasia ai se laei i ona teuga eseese e ese foi le mataina.

“Ou te faailoa atu e a’u ia ona o loo ma galulue faatasi aemaise ma si matou team i le taumafaiga o lenei taleni ma agavaa foi ua o matou maua.”

Na ia ta’ua ai o faaaliga faapenei o se molimau ola lea i le maualuga o le tulaga i agavaa o tagata o loo faatinoina lenei galuega.

“E lē aumaua nei avanoa i fafo mai o Amerika Samoa e faalauiloa ai taleni ma agavaa.

“Atonu e seāseā oo mai matou mai Amerika Samoa ae faafefai ua maua lenei avanoa e auai ai, o lo’u talitonuga o se auala lelei lea mo tatou pisinisi a mafai ai e isi atunuu e pei o Amerika, Ausetalia, Niu Sila ona oo lo latou tomai i soo se teuga o se laei e mafai foi e tatou ona tatou faia.

“E tosina mai foi tagata e faatau a tatou galuega pe a vaavaai ma silafia laei o le a faaali i lenei faaaliga.”

E 12 le aofai o laei eseese na tuufaatasia e le Lagaali Atelier mo le faaaliga i le afiafi anapo.

“O nei teuga eseese o laei e ta’ua o le bridal wedding party collection ma o le ala foi ua faia ai lenei collection mo le faaaliga e iai le naunautaiga foi lea tatou te tau lē o mamao i isi atunuu e faatau mai ai ni laei mo faamoemoe tetele tatou te o iai.

“E maua lava i o tatou atunuu teuga e manao iai e pei ona faailoa atu tatou te taumafai lava i le mafai e oo atu ai i le tulaga o loo iai i atunuu mamao.”

O le tele o faamoemoe a le Malo o Amerika Samoa aemaise ‘aiga a ekalesia ma soo se tuufaatasiga ua oo ai le auaunaga a lenei pisinisi ae le gata i lea o atunuu e mamao.

“E iai nisi o faamoemoe faaleaganuu e masani ona o matou tuufaatasia o latou laei aemaise nisi mai atunuu mamao e okaina atu laei.

“O le mau tauave lava a le Lagaali ia faamalieina oe, poo ā foi ni au tifiga e te manao iai i lou laei e lē mafai ona o matou faatamala ai i lea vaega auā a faamalieina oe i lou laei o le fiafiaga lena ia i matou.

“Ae ese foi lagona pe a vaai atu i se faamoemoe o laei mai e se tasi se ofu na o matou galulue ai, o le pine faamau foi lena o a matou taumafaiga.”

O le afiafi ananafi na amatalia ai le vaega mulimuli a le Life-Con Pacific i le maota o aganuu a Samoa i Malifa.