Na amata i le ulua’i aso o lenei masina fou o Novema le Aso Toona’i ua mavae atu nei le tau o afā ma timuga mamafa poo le cyclone season mo atunuu uma o le Pasefika i Saute e aofia ai ma Samoa.
Ua faailoa ai i se lipoti o le tau lenei o afā le valoia o le lima i le iva afā e ono aafia ai atunuu i Saute i Sisifo.
O atunuu ia e aofia ai Ausetalia, o Niu Sila, Fiti, Papua Niu Kini, o Solomona ma Vanuatu, ae o Samoa e itiiti lava se avanoa e afea ai ona ogasami e se afā se’ia vaganā se afā e tasi ua valoia e ono aafia ai.
O le vaiaso na te’a nei na faailoa ai e le ofisa o le vaaitau i Samoa lana lipoti i le vaaiga mamao o le tau o afā ma timuga mamafa o loo faailoa ai foi lea afā e tasi o loo valoia le ono oo atu o lona malosi i le Laasaga Tolu poo le Category 3.
