Ua sala tupe $3000 le alii sa avea ma tagata faigaluega a le Ofisa o Tiute ia Pueleo Sefululua Peseta ina ua tuuina mai e le Faamasinoga Faaitumalo lana faaiuga i le vaiaso ua tuanai.
E lua moliaga o le faaulufale mai o fualaau faasāina o le Methamphetamine na molia ai Peseta i lalo o le Tulafono a le Ofisa o Tiute poo le Customs Act ae lē o le tulafono o nakoti poo fualaau faasāina.
E $1500 le sala o le moliaga e tasi.
Sa teena e lea alii ona moliaga ae na faamaonia e le Faamasinoga lana solitulafono ia Novema o le tausaga ua mavae.
O Tesema i le 2020 na molia ai e leoleo lea alii a o faigaluega ai e tusa ma le fā tausaga i le Matagaluega o Tiute ma Tupe Maua.
O ni faamomoli na auina mai Amerika i lalo o le igoa o lea alii, na maua ai i totonu ia fualaau faasāina.
Sa valaau e leoleo le silia i le 20 molimau ina ua suesue lea mataupu i le faamasinoga, ae o le mau a lea alii, i lena taimi o ia e faate’ia ina ua vili atu le kamupani a le Transam o se faamomoli o loo auina mai lalo o lona igoa mai Amerika, na ia ta’ua e leai sona malamalamaaga i le tagata na auina mai ai lea faamomoli, na pau le faamomoli sa ia faatalia i lea taimi o se vaega o le afi o lana taavae na oka i Niu Sila.
O le sala tupe a lea alii e tatau ona totogi a o lei mae’a ai aso e 14 a leai e 6 masina i le Falepuipui.
