O le vaiaso ua mavae sa faatino ma faamanatu ai le 10 tausaga o le mafutaga a tagata Samoa o loo aumau i Suetena poo Sweden.
Na vaaia ai le faatumulia o lenei faamoemoe e o tatou tagata o loo aumau i lenei atunuu e faatino nisi o tu ma aganuu a Samoa.
Na ta’ua e lē o loo faauluulu iai lenei mafutaga ia Lucy Larsson le tāua tele o lenei faamoemoe mo a latou fanau tuputupu a’e.
“O le sini autu lea o le matou mafutaga o a matou fanau, o se mafutaga e a’oa’o ai aganuu, le gagana, siva Samoa, faiga o meaai Samoa, ma uiga o aso uma o tagata Samoa.
“O matou foi ia ua matutua e lagona foi le fia mafuta i isi tagata Samoa.
“O le faamoemoe la o lenei tausaga o le faailogaina o le 10 tausaga sa tauasa mai ai i auala fita ma faigata, ae ua matou vaaia ma molimauina fua manuia o a matou galuega.
“O le mafutaga e 4 aso e faatino ai polokalame e pei o siva Samoa, faatinoina o le ‘ava o feiloa’iga, o aoga Samoa o upu faigofie ma le faitauina o le Pi tautau, o le viliina o le laau e a’oa’o ai le viliina o le siva afi ma le nifo oti.
“E faamatala foi fagogo ma tala Samoa ma le gaseseina o meaai ma faamatala i tamaiti meaai Samoa – panikeke, panipopo, sapasui, faalifu taro, oka, palusami ma isi.”
Na ia ta’ua foi sa auai ai nisi o tagata Samoa o loo aumau i Siamani, Denmark ma Egelani.
“E to’a 99 tagata sa auai i le matou faamoemoe e aofia ai ma matou fanau ae mo Suetena lava ia e 60 i matou oloo faia le mafutaga a Samoa.”
“O le matou mafutaga e fa’atasi lava ona feiloa’i i le tausaga ona o le mafuaga e vava mamao nofoaga matou te nonofo ai.”
“E le faigofie auala o femalagaiga, o fuafuaga uma e fa’atatau i galuega ma aoga a fanau aemaise foi o vaitau mafanafana o tuuaga umi lea a aoga ma aso malolo o tagata faigaluega i Suetena.”
“E fa’atauaina lava i le matou mafutaga o le fiafia ma mitamitaga o matou o ni tagata nu’u o Samoa o se faamanatu foi lea iai matou ia aua nei galo lo matou faasinomaga poo fea lava le itu ole kelope e te aumau ai ia e manatua lava le atunuu sa fofoa mai ai lou olaga.”
O lenei mafutaga na faavaeina mai ile 2013.
“I le vaitau mafanafana (summer) o le tausaga 2013 sa valaau mai ai le tama’ita’i o Alofa Tauilili ia matou Samoa i Suetena nei.”
“E sau tausaga alu tausaga, e fa’atupu manatu ma lagona i le vaai atu i le matagofie o le fiafia o fanau fa’apea matou uma lava.”
“Sa talatalanoa foi matou uma e tatau ona su’e se nofoaga lelei aua ua fai si toatele o matou.”
“Sa ou vaa’ia fatu toto ua amata ona ola lauusiusi ma le naunauta’iga o lo’u tagata ia faaauau pea lenei mafutaga e pei o se aoga Samoa.
“O le sefulu tausaga o le faailogaina lea o se fa’avae ua mautu ma o se fiafiaga lea ma le agaga fa’afetai e fo’i ai le viiga i le Atua.”
“O lo’u talitonuga e le tau fa’ailoaina Samoa i ni polokalame ae o le a’oa’oina o amioga ma tu ma aga o aso uma e amata i le fa’aaloalo, loto alofa ma le fa’autauta.”
“Ua maitauina ua fua mai a matou galuega i le matou mafutaga i a matou fanau ua vaaia le mitamita o ia o le tama ma le teine Samoa.”
“O le tausaga fou foi pea aulia ile alofa ole Atua olea faia ai foi nisi o tapenapenaga ale matou mafutaga ia faatumauina pea le fealofani iai matou uma.”
“E ese le matagofie o mafutaga ae galulue fa’atasi ole malosiaga lea o le matou mafutaga.”
“E tofusia lava le tagata ma lana matafaioi ma le tiute e fa’atino e tu’u lava le fa’atuatuaga i le tagata ia e tula’i mai e fa’aaoga lona tomai ma lona agava’a.”
” A i ai ni fa’afitauli e talatalanoa ma sailia auala aua le alualu i luma mo le lelei ma le atia’eina o matou tagata ma le matou mafutaga.”
