Ua faamautu nei se tasi o fesoasoani a le Iuni a Europa e tauala mai i le Faalapotopotoga o Faatoaga ma Taumafa a le lalolagi le F.A.O. mo se tasi o polokalame fou a lea faalapotopotoga o se lala o Malo Aufaatasi, mo le siitia o le tulaga o le atina’e o faatoaga ma faigafaiva i lo tatou atunuu, faapea atunuu o Fiti ma Solomona.

Ua faailoa e le Minisita o Faatoaga ma Faigafaiva le susuga Laauli Leuatea Polataivao Fosi Schmidt, le faamautu o lea foai ina ua mae’a ona ia sainia faatasi ai ma Minisita o faatoaga a Fiti ma Solomona le feagaiga ma le iuni a Europa e faamatuu mai ai lea fesoasoani.

O le Aso Gafua le amataga o lenei vaiaso na sainia ai lea maliega i Fiti e pei ona tuua ai le atunuu e le minisita mo lea sainiga lima. 

Le afioga i le Minisita o Faatoaga ma Faigafaiva mai Fiti i sana faasalalauga i auala o fesootaiga faaonapo nei sa ia faalauiloa ai le fesoasoani a le iuni a Europa ma le F.A.O.