O le faiga fou a le malo ua faalauiloa mai i le vaiaso nei e faatatau i le faia o tusifolau o le a vave ai ona maua ma taugofie foi, ua saunoa iai le teutupe Jim Chalmers e faamanino.
O le taimi nei o loo totogi e le tagata e agavaa mo le tusifolau Ausetalia le $252 mo le talosaga faavavevave a e maua ai le tusifolau i totonu o le 2aso faapisinisi peitai e iai se faiga fou ua faailoa mai e le malo.
E amata atu i le aso muamua o Iulai o le a mafai ona maua e tagata Ausetalia o latou tusifolau pe a talosaga iai i totonu o le 5 aso faapisinisi ae na o le $100 e totogi pe faatali foi i le ono vaiaso o le taimi faatali masani.
O tagata Ausetalia o loo mautotogi i fale pe o loo rent ma manaomia se fesoasoani, o le a mauaina se fesoasoani i lalo o le fuafuaga a le malo ua faailoa mai i lalo o le Tala Faatatau o le Tupe poo le Paketi ua faailoa i le vaiaso nei.
O loo iai le fuafuaga a le Malo e tuuina le $1.9 piliona e faaopoopo ai le fesoasoani lea a le Commonwealth Rent Assistance i le 10 pasene.
I lalo o lea faiga o i latou uma o loo maua le penefiti ma o loo mautotogi o le a oo atu i le $250 i le lua vaiaso.
Ua ta’ua e le 7News e toeititi 170afe le lisi o tagata o loo i le lisi faatalitali mo fale faalauaitele ma le 122 afe e lē o iai ni mea e nonofo ai.
E tele vaega ua oo atu iai le faasoa a le malo i lana Tala Faatatau o le tupe e aofia ai foi ma se vaegatupe e tasi le piliona ua faaagaga mo ni nofoaga e aumau ai tina ma tamaiti e agai ese mai ma ni mafutaga e sauaina ai i aiga.
Puna o Faamatalaga: https://7news.com.au/news/fast-tracked-processing-of-passport-applications-available-to-australian-travellers-from-july-1-c-14669426
