O le Aso Lua o le vaiaso nei na amata tuli ai le fa’asalaga fa’afalepuipui o se tama’ita’i sa ia ioeina moliaga e tolu e feso’ota’i i le gaoia o le aofaiga o le tupe e $28, 990 tālā, o se meatōtino a le Kamupani o le Newshore Group limited i Taufusi ma Vaitele.

O Sepora Tapuotaota 31 tausaga le matua o lona soifua sa galue ai i le kamupani, ae o le masina o Mati ma Aperila o le tausaga na te’a nei na ia tala ai ni siaki a le kamupani i se auala solitulafono ma ia fa’aaoga ai le aofa’iga o le tupe e lata i le 30 afe tālā.

Fa’aalia e le afioga i le Fa’amasino Sili i lana fa’aiuga, e leai ma se tupe na mafai ona toe totogi e lē ua molia i le kamupani sa fa’afaigaluegaina o ia ma o se itu ogaoga lea i le iloiloina o le fa’asalaga.

O lē ua nofosala i le falepuipui e to’afā lana fanau. Ua nofosala ai i le lua tausaga ma masina e lima i le to’ese i Tanumalala.