Ua molimauina le toe aliali mai o faiga solitulafono o lo’o masalomia o loo faia e se tagata poo ni tagata, o le fa’aaoga o tupe taufa’asesē e foliga o ni tupe pepa moni ma ua salalau ma o’o atu i nisi o faletupe i le atunu’u.

O le faletupe o le National Bank of Samoa ua latou ave le lapataiga i tagata ina ia mata’itū lelei ma siaki tupe pepa ona ua fa’atupula’ia le salalau o tupe pepa taufa’asesē e mafuli i le $50 ma le $100 tālā.

Ua aumai foi i se tulaga fa’alaua’itele se fa’asalalauga a le Faletupe Tutotonu o Samoa ua lapata’ia ai tagata o loo faia lea solitulafono ma fa’ailoa ai le fa’asalaga pito maualuga e 14 tausaga i le falepuipui pe a faamaonia le gaosia o ni tupe taufa’asesē, po’o le fa’aleagaina o tupe e aofia ai siliva ma tupe pepa.

O le tausaga e 2011 na faamaonia ai e le faamasinoga a le atunu’u se solitulafono faapea na fa’afalepuipui ai e le faamasinoga maualuga se ali’i 39 tausaga le matua mo le 3 tausaga ina ua ioe i moliaga e 10 o lona gaosia o tupe taufa’asesē poo counterfeit money.

O le fautuaga i le atunu’u silasila lelei i tupe pepa 50 ma le 100 tālā i fa’ailoga o loo iai ma le ‘ese’esega ma tupe taufa’asesē a’o le’i taliaina se tupe mai se isi tagata. O le fautuaga foi lea i le ‘au faipisinisi o loo faia ai fa’atau o oloa ‘ese’ese.