Ua lalata mai aso fiafia o le Kerisimasi e fa’amanatu e Samoa ma le lalolagi i le masina o muamua nei o Tesema, ae ua tomua faigāmeaalofa mo le auaunaga a le To’omaga mo e Puapuagatia o lo’o va’aia fanau sauāina ma fa’atino fo’i polokalame e taofia ai sauāga i se foa’i tupe e 15 afe tālā Amerika po’o i le silia i le 40 afe tālā Samoa mai le agalelei o kamupani va’a o le Matson ma le Betham Brothers.

O se foa’i tupe ua taua’ao e le Peresitene o lea fa’alapotopotoga sa avea ai le susuga La’auli Michael Jones o le sui o le kamupani va’a o le Matson e tu’uina atu le siaki tupe i le fa’auluuluga o le To’omaga.

Ua fa’aalia ai e le Pereseitene le faletua o Muliagatele Siliniu Lina Chang le loto fa’afetai i ia kamupani va’a i le agalelei ma le fa’atāua o le latou auaunaga na mafua ai a latou sā’iliga seleni ua maua ai lea tupe tele e fesoasoani i galuega fai a le faalapotopotoga.

Sa auai foi le sui o le kamupani va’a o le Betham Brothers o Tina Betham i le taua’ao atu o lea fesoasoani. O le agalelei o pisinisi ma tagata ta’itoatasi faapea Ekalesia ‘ese’ese o loo mafai ai ona fa’atino i tautua a lea faalapotopotoga i Samoa.