Ua na o le to’alua faipule o le faafaletui o le patī faaupufai e puipuia aiā tatau a tagata, sa talosaga i avanoa o tofiga ta’ita’ifono o Fono Faavae mo le faafoeina o le poloketi miliona tālā, ma ua na o le to’alua foi lea ua filifilia.
O le sui faipule o Safata 2 le afioga Tuiā Pu’a Fuatogi Letoa, ma le faipule o Vaimauga 4 le afioga Lima Graeme Tualaulelei.
O le isi to’a 12 o faipule o lea patī faaupufai e le’i talosaga ae sa ave le latou tusi faaseā i le poloketi.
Ua faailoa e le Palemia i le feiloa’iga ma tusitala i le Aso Lulu ua mavae o le a faailoa e le minisita o loo iai le vaaiga o lea poloketi a le malo ta’ita’ifono uma ua filifilia, ae mo le fuafuaga a le Itu Agai e ave i le faamasinoga le filifiliga o ta’ita’ifono o komiti a Fono Faavae ua faaalia e le Palemia o le aiā tatau lea o le ta’ita’i ma le itu faaupufai o loo agaia le malo.
Ua taoto le fuafuaga e tatau ona toe a’e galuega o le tausaga fou i le aso 12 o Ianuari 2026 ua amata ai ma galuega a ofisa o Fono Faavae.
