Ua tapena le Faamasinoga maualuga mo se aso e tulai ai luma o le faamasinoga se tasi na avea ma Satini Leoleo lea o loo molia nei, masalomia i le faia o amioga matagā i se tamaitai leoleo i le Ofisa i Fagamalo ia Fepuari o le tausaga na te’a nei.
O Reupena Oloapu sa vaaia le Ofisa o Leoleo i Fagamalo i le motu tele i Salafai i le taimi na tulai mai ai le solitulafono, o loo molia nei i le tasi le moliaga o le faia o gaioiga faasolitulafono, tasi le moliaga o le faia o uiga matagā ma le moliaga o le gaioiga matagā faasolitulafono.
Na tali tetee lea alii i moliaga uma e tolu ua molia ai, na muamua tulai lea alii i luma o le faamasinoga i le masina o Mati 2021 e aunoa ma se loia ma na tuu iai le avanoa mo se loia mo lana mataupu.
I le taimi na masalomia na tulai mai ai le faalavelave na faamālōlō ai lea alii mai le galuega ma na faailoa e le Komesina o leoleo i lea vaitaimi Fuiavailiili Egon Keil e lē vaai māmā le Matagaluega i mataupu faapea e tulai mai totonu o le galuega.
