E to’afā ni talavou na taofia e leoleo i le taeao o le Aso Tofi i se matāupu na tula’i mai i faaitu o Miramar i Ueligitone.
Faamauina na vaalau ane leoleo mo se fesoasoani i se tasi o faleoloa i Tauhinu Road poo le 10 minute e te’a ai le 2 i le vaveao, ina ua lipotia le tele o faailoilo ua faalogoina poo alarms i lea taimi o le vaveao.
Ta’ua na faaaogā e ia talavou se taavale, e soso’a ai le faleoloa ua aafia nei, ma i le oo atu o leoleo i le nofoaga, ua ta’e le faitoto’a tioata o le pito i luma o le faleoloa, ma ua na o le taavale o iai ae ua sosola ese talavou na faatinoina le soligatulafono.
Ae ui i le sosola ese ai o nei talavou, na maua atu lava e ta’ifau sosogi le itu ma le nofoaga na lalafi ai, o le itu e lē mamao atu lava ma le faleoloa na o latou faaleagaina.
Na maua e leoleo le tele o ‘ava malosi na gaoia mai le faleoloa, faapea ma se taavale gaoi.
Faaalia le agaga fiafia o le ta’ita’i leoleo asiasi – Wellington Commander Inspector, Dean Silvester i le mafai ona faatino o le galuega ma le vave maua ai o i latou nei.
E 16 tausaga le matua o le tasi talavou, e to’alua e ta’i 17 tausaga le matutua ma le isi e 19 tausaga lona matua, na tūtūla’i i luma o le Faamasinoga Faaitumalo o Ueligitone ma ua tatala nei i tua e tālia ai le vaalauina o le latou matāupu i se taimi o lenei masina.
Puna o Faamatalaga: https://www.rnz.co.nz/news/national/591935/four-teens-arrested-after-ram-raid-in-wellington-suburb-of-miramar
