E to’atolu ni tama tane e aofia ai se matai o le nuu o Mutiatele i Aleipata ua molia e leoleo e mafua i le faatama’ia i le malaia poo le afi o le maota o se isi matai o le Pulenuu o lea afio’aga.
O le maota atoa ma meatotino sa i totonu ua lipotia e tusa le tau aofai ma le 200 afe tala na faatama’ia uma e pei ona faailoa mai e le sui Komesina o leoleo le susuga Auapa’au Logoitino Filipo i se talanoaga i le telefoni anapo. Faaalia e le sui komesina o le to’atasi o i latou ua molia i le faatinoina o le solitulafono o loo nofo taofia i le vaaiga a leoleo a o le isi to’alua ua tatala i tua i ni aiaiga e pei o le faasā ona toe tuvae i le nofoaga na faatino ai le solitulafono.
O le maota o le Pulenuu ei Ti’avea uta ma o nisi o le to’atolu ua molia e tuaoi lo latou fale ma le maota ua faaleagaina i le malaia. O le faamatalaga mai leoleo na mafua ona tulai mai lea faalavelave tau mu ona ua lē fiafia i le aiga oi latou ua molia i le molita’i e le Pulenuu o ni inugapia sa faia ei latou ia ae o loo faate’a ma le faiganuu.
O le aso 13 le Aso Gafua asau e tutulai ai le to’atolu ua molia i le faamasinoga.
