O faavaa o faiga faavae o loo pulea ai faalapotopotoga tuma’oti a le Malo o Niu Sila o se vaega tāua lea sa fia silasila ma faafofoga iai le aumalaga mai le matagaluega o auaunaga tuma’oti a le Malo o Samoa, sa latou afea Niu Sila ma feiloai ai ma le faauluuluga o lea auaunaga i Aotearoa.
O le Minisita le tofa Leatinuu Wayne Sooialo, o le ofisa sili ma ni ofisa sinia o le matagaluega o faalapotopotoga tuma’oti a le Malo o Samoa sa feiloai ma le Ofisa Sili o lea auaunaga a le Malo o Niu Sila ma fetufaaa’i ai i mataupu e pei o faavaa o faiga faavae poo policy frameworks.
I le pepa o faamatalaga faalauaitele mai le ofisa sooupu a le Malo o loo faailoa ai o se feiloaiga tāua tele e faatonu folau ai le pulea o faalapotopotoga tuma’oti a lo tatou Malo, e pei ona iai le sao o nisi o ia auaunaga tuma’oti o loo tuuina atu ai a latou tupe maua e fesoasoani i galuega o le atinae o le tatou tamaoaiga.
O Niu Sila ua muamua iai le minisita ma lana aumalaga o se vaega o se asiasiga saili faalumaga mo le lelei o le pulea o a tatou faalapotopotoga tuma’oti o loo pulea e le Malo, ma ua faailoa i le pepa o faamatalaga o Fiti o le a taualuga iai le asiasiga ina ua mae’a asia le atunuu o Tonga.
