O le tama’ita’i o Kealey Perez o le tama’ita’i Samoa muamua lea ua manumālō i le pine auro mo lo tatou atunuu i le tausinioga o le taamilosaga faipēlē mo tupulaga talavou o le lalolagi e i lalo o le 19 tausaga le matutua.
O le vaega o tama’ita’i i le paga o le 80 kilokalama na fusu ai Kealey ma manumālō ai i le sa’iliga siamupini ae mālōlō le tama’ita’i fusu mai le atunuu o Tuvalu.
O le pine apamemea na manumālō ai foi Samoa i lea taamilosaga i le taaloga o le faipēlē mo tupulaga e i lalo o le 19 tausaga le matutua lea na manumālō ai le alii o Anthony Pati i le vaega o le 90 kilokalama.
E to’alima le aufusu a Samoa na masii mo ia taaloga faavaomalo sa tapenaina e le faalapotopotoga o taaloga faipēlē a Samoa le Independent Boxing Samoa Incorporated o se itutino tuma’oti ua feagai nei ma le pulea ma le a’oa’oina o alo ma fanau a le atunuu i le taaloga o le faipēlē poo le fusu.
O lea taamilosaga sa tausinio ai Samoa o se vaega o tapenaga a atunuu o le Oceania mo taaloga Olimipeka mo tupulaga o le a faia i se taimi o le tausaga nei.
