E lua isi matāgaluega a le malo ua mautū faai’uga ua filifilia ai o la Ofisa Sili e faauluulu iai ia auaunaga a le malo.
O le matāgaluega o Alamanuia, Pisinisi ma Leipa o le afioga Fepuleai Roger Toleafoa le Ofisa Sili o le a tauaveina le pulea o lea matāgaluega ma ua sui tulaga i le afioga Pulotu Lindon Chu Ling na faamavae.
O Fepuleai o se tamālii ua tele tausaga o galue i lea matāgaluega a le malo.
O le afioga Leasoiloafaleupolu Ronnie Siaosi Aiolupotea o le Ofisa Sili fou lea o le Matāgaluega o Fesoota’iga ma Faamatalaga Faatekonolosi, o se tamalii e tofia o loo galue i le matāgaluega ma ua sui tulaga i le afioga Lefaoalii Unutoa Auelua Fonoti.
O le Ofisa Sili fou o se tasi o ofisa sili lagolago o lea matāgaluega a le malo ma o loo ia umia faailoga maualuluga, o tomai ma agavaa mo galuega tau fesoota’iga faatekonolosi.
E faapena foi i le afioga Fepuleai Roger Toleafoa ua avea nei ma faauluuluga fou o le Matāgaluega o Alamanuia, Pisinisi ma Leipa.
O le tolu ai lea o Ofisa Sili ua filifilia ma faamaonia e le Kapeneta e pei ona sa faailoa talu ai nei le Ofisa Sili filifilia mo le Matāgaluega o Tupe Maua.
