I se faasalalauga faalauaitele a le auaunaga o leoleo e ala i le latou pou le Southern District Police, le maua ai e i latou tagata sāili, poo search teams o se tino maliu poo le lata i le 9 i le taeao o le Aso Lulu o lenei vaiaso i itu saute o Mount Huxley, a o fasolo so latou sailiga mo se ali’i a’e mauga poo se climber e suafa Connor Purvis.
Ae faamauina e leoleo e ui e lei māua lelei tulaga o lenei tino maliu, ae e iai talitonuga a leoleo e tusa ai ma ripoti, o lē ua fano le ola, o le ali’i o loo tausāilia ia Connor.
Māua i ripoti o Connor e 20 tausaga ma sa ia iai fuafuaga o lenei ali’i e na te pe’a pe a’e i luga o le mauga o Mount Huxley i le masina ua te’a.
Faamauina le faigata o le sailiga o le le talavou 20 tausaga, ona o tulaga gaoa ma le maualuga.
Ta’ua o le galuega faatino i le faatautaia ai o lea sailiga, e fai lava sina telē ma le toatele o auaunaga ma tagata lautele na galulue ai.
Na faafetaia e leoleo tagatanuu o Omarama ma Mackenzie mo le latou lagolago ma le fesoasoani i le galuega fītā. Na faafetaia foi e le auaunaga i latou uma na ofo o latou taimi e saili ai le talavou, o sui o faalavelave tutupu faafuase’i ma le tele o faalapotopotoga na auai faatasi i lea galuega.
Faaleo foi le agaga faafetai a leoleo i aiga, uo ma ē masani ma le ali’i o Connor, ma ua tuuina mai ai foi ma faamaisega mo aiga i le motusia ai o le mafutaga ma lenei ali’i.
Puna o Faamatalaga: https://www.facebook.com/share/p/1AZWLCcfbe/
