Ua faailoa ai nei e le tama’ita’i Minisita o Tupe, le afioga Mulipola Anarosa Ale Molioo le amata ai o le tausaga fou i lona uluai masina, ma le si’itia o le tau o oloa tau suāu’u ma penisini i lo tatou atunuu.
Ua faailoa e le minisita ise pepa o faamatalaga ua faailoa ai tau fou o ia oloa manaomia, o le tau mo le masina o Ianuari o lenei tausaga fou 2026 sa fuafua mai ile uta o suauu o le masina o Novema o le tausaga ua mavae 2025 lea sa taunuu i Apia i le masina o Tesema o lena lava tausaga.
Ae o tau mo oloa suauu ua faamamaina ma suauu e lei faamamaina na toe siitia mo le masina amata o lenei tausaga. Fa’aalia e Mulipola o se masina sa faigata ma lavelave mo le maketi ona o le tapunia faafuasei o fuafuaga tau tupe a le malo o Amerika lea na faaopoopo atu i lu’itau fa’aauau tau upufai o malo o le lalolagi, ma faapena ona aafia ai tulaga i le tamāoaiga ma mataupu tau i le lē mautonu o loo iai le maua o le suāu’u i le tausaga atoa ua mavae atu nei.
Ona o ia tulaga ua faatulaga mai ai e le Matagaluega o Tupe a le malo tau fou o ia oloa mo le masina amata o lenei tausaga i le 2 tala 97 sene i le lita le tau fou o le penisini, suāu’u tiso ua 3 tala 22 sene i le lita ma le kalasini ua 2 tala 85 sene i le lita.
