Ua 31 tausaga talu ona faatūina i Samoa le ofisa tutotonu o loo tapuvae tasi iai galuega ma polokalame o le puipuia o le siosiomaga o atunuu o le Pasefika le SPREP, o lona nofoaga tutotonu o loo i Vailima.
O le vaiaso nei i le fono a le komiti faatonu o le SPREP na tatala e le minisita o le matagaluega o puna’oa faalenatura ma siosiomaga le afioga Toeolesulusulu Cedric Schuster, lea sa ia ave ai le lu’i i sui o le Komiti Faatonu ina ia toe silasila i faiga faavae ma manulauti o galuega a le faalapotopotoga pe o aogā ma iai se tāua mo atunuu o le Pasefika.
Faaalia e le minisita i lana saunoaga i lea fono o le toe silasila o le toe silasila o le faalapotopotoga i ana galuega faatino, e iloa ai poo iai se tāua mo atunuu, ia poo aga’i ina faaletonu.
O le tausaga nei e 40 miliona 679, afe ma le 684 tala le paketi poo le vaegatupe o loo faafoe ai galuega a lea faalapotopotoga, ma lana aufaigaluega e 150 o sui mai atunuu o le Pasefika.
O lenei vaitau ua tele aafiaga ogaoga o atunuu laiti i suiga o le tau, ma o se tasi lea o auaunaga ua iai nei i le nofoaga autū o lea faalapotopotoga o loo mata’itūina aafiaga o atunuu o le Pasefika mai suiga tetele o le tau.
