Ua momoli atu e le faamasinoga se fautuaga malosi i le tamā o Va’a Alaifatu o le isi ona suafa e iloa ai o Paulo Tasi Solofa 46 tausaga le matua, ina ia toe fuata’ina lelei lona olaga, ma alofa lelei i lona to’alua ma lana fanau, ma ia pulea lona loto mai le ita.

O le tasi o feau tāua a le fa’amasinoga i le tamā o Va’a poo Paulo, e lē solomuli le tulafono i le faia o le fa’asalaga talafeagai i se tagata e pei o ia, na te faia le solitulafono o le fa’alālā o se la’au malosi i ave ta’avale ma tagata feoa’i i ta’avale i luga o le alatele.

E lua ni gaioiga i luga o le alatele na faia e lē ua molia na mafua ai ona taofia e leoleo mo su’esu’ega ma molia mulimuli ane ai. O lona faalālā o se fana laitiiti i se tinā sa ia fa’afoe lana ta’avale ao iai ma lana fanauiti. O le isi gaioiga o le fa’alālā foi o le la’au malosi i se tamā 50 ma ona tupu tausaga a’o fa’afoe lana ta’avale laitiiti la’upasese i luga o le auala.

Na lafo ai e lē ua molia ni tala tau faamata’u e pei o lana tala na fai i le ave taxi ma fa’alālā le aupega, toeitiiti alu atu e fana lona fofoga sei tulou. O ia gaioiga uma o loo pogisa ai le ave taavale laititi laupeasese ma le tina na aafia pe aisea na faia ai e Va’a poo Paulo.

Sa molia foi e leoleo i lona umia o se sikaleti maruana e tasi, ae ua fa’ailoa i le fa’aiuga a le fa’amasinoga o lea taule’ale’a sa falepuipui i Niu Sila a’o fa’amautū ai i solitulafono o le talepe fale ma le ave fa’agaoi o se ta’avale.

O le 18 o ona tausaga na a’afia ai i ia solitiulafono a’o nofo i Niusila lea na ia tu’ua Samoa i le 2 o ona tausaga. Na uma ona tuli lona fa’asalaga lea ona tupoti ese lea ma toe malaga mai i Samoa ile tausaga e 2014.

E silia ma le sefulu masina o nofo taofia i le va’aiga a leoleo talu ona a’afia i solitulafono na molia ai ia Tesema o le tausaga e 2024. O le fuaina o se faasalaga na faatoa lau i le aso 16 o le masina nei o Oketopa o masina sefulu na taofia ai o lona faasalaga lea i le falepuipui.

Ua toe tuu iai le isi avanoa e le fa’amasinoga e auai ai i polokalame mo le toe fuata’ina o lona olaga i se taumafaiga e taofia lona toe a’afia i se solitulafono. Ua faaopoopo iai ma le 9 masina e nofo va’avaaia ai.