O lea ua fa’ailoa lautele le faia ai i le aso 6 o le masina fou o Novema o le ulua’i fono fa’aletausaga a le Iuni Lakapi fou i le atunu’u le Samoa Rugby Football Union, lea o le a toe fa’atulaga ai le fa’ata’otoga o sui o lana Komiti Fa’afoe ma talanoaina ai nisi o mataupu tāua i le fa’afoeina o lea iuni lakapi.

E lima iuni lāiti poo sub-union i Upolu ma le tasi mai le motu tele i Salafai o loo aofia i le komiti fa’atonu faapea ma le sui o le iuni lakapi a aoga maualuluga i le atunu’u. E to’afā sui tuto’atasi poo independent members e filifilia mai i le vetting committee.

Ua fa’ailoa e le failautusi o le iuni lakapi a Samoa e fa’atoa tu’uina atu lana lipoti fa’aletausaga o le tala o le tupe i le isi fono fa’aletausaga e soso’o ai.

Ua mafua lea tulaga ona e fa’atoa mae’a le tausaga fa’aletupe a le iuni i le faai’uga o le masina o Tesema o le tausaga nei.