Ua fa’apine le malaga mai i Samoa o le Ta’ita’ifono o le Pulega o le ta’aloga lakapi a le lalolagi ia Dr Brett Robinson i le faae’e iai o le suafa matai o Manūmailagi.

O le fa’aaloalo maualuga lea na amata ai le polokalame o le malaga mai i Samoa o lea ta’ita’i aoao o le lakapi i le lalolagi e feiloa’i ma fa’atalanoa ma le Palemia o le malo o Samoa, faapea ma sui o le pulega o le Lakapi i lo tatou atunu’u mataupu o loo va ai le fogava’a ma mafua ai ona fa’asolomuli e le tatou malo lona toe ave o ni fesoasoani i le Lakapi Samoa.

O le faae’eina o le suafa matai o le tai’ta’ifono sa faia i le maota Samoa o le Pulega o Tagata Tafafao ma sa ‘auai le palemia ma le kapeneta.

O le feiloa’iga a le palemia, susuga Laaulialemalietoa Leuatea Polataivao Fosi ma le afioga Manūmailagi Dr Brett Robinson i le ofisa o le ta’ita’i o le malo na foa’i ai e le ta’ita’ifono o le lakapi a le lalolagi se polo lakapi o le ta’amilosaga o le ipu o le lalolagi ile afioga i le palemia o le tatou atunu’u.

I le upega tafāilagi a le pulega o le Lakapi Samoa o loo fa’ailoa ai le feilo’aiga a le ta’ita’ifono o le lakapi i le lalolagi ma sui o le komiti fa’atonu.

O lo’o fa’ailoa ai o se feiloa’iga ua fa’amautū ai nisi o vaega taua i le fa’afoeina o le atina’e o le lakapi i le atunu’u faapea ma le puleaina o le ta’aloga.