Ua avea Samoa ma atunu’u i le Pasefika ua taulāmua i le faia o tapenaga e puipuia lelei ai lona s’iosi’omaga mai otaota lafoa’i e lamatia ai le saogalemū o le si’osi’omaga fa’alenatura aemaise le soifua o tagata, e pei ona ave le fa’amuamua i le tapenaina o suāu’u lafoa’i ua le toe fa’aaogaina, i le fa’amoemoe e ave’esea ma lo tatou atunu’u.

O le nofoaga i Tafaigata o loo lafoa’i iai otaota ma lapisi o loo teu ai le tusa ma le 60 afe lita o suāu’u ua lē toe fa’aaogaina ona ua lafoa’i ma o le autū lea o se a’oa’oga sa fa’atautaia e le Matagaluega o Punaoa Faalenatura ma Si’osi’omaga faapea auaunaga tuma’oti o loo latou aoina otaota lafoa’i i le autu e tapena nisi o le aufaigaluega a le malo i Matagaluega o loo auai i tapenaga o le ave’esea o ia suāu’u lafoa’i mo le ave’esea ma le atunu’u, ina ia saogalemū vaega uma pe a tu’ua le nofoaga i Tafaigata o loo teu ai.

Ua fa’ailoa i se pepa o faamatalaga mai le fa’alapotopotoga o le si’osi’omaga o le pasefika le SPREP, o le a’oa’oga i le vaiaso ua mavae sa auai foi sui mai le vaega tuma’oti ma auaunaga e feso’otai a latou galuega i le puipuia o le si’osi’omaga ina ia a’oa’oina i latou i le fa’atinoina o lea galuega ina ia o latou silafia auala uma e malu puipuia ai le atunu’u i le afāina o lona si’osi’omaga.

O loo iai le tapenaga e faia foi lea a’oa’oga i nisi o atunu’u o le pasefika ina ia saga faalauaitele iai tomai e taulimaina ai galuega mo le ave’esea lava o ia otaota lafoa’i.