O le a fai Kerisimasi ma Tausaga Fou i le falepuipui i Tanumalala se tama talavou 29 tausaga le matua, ina ua amata i le masina nei o Oketopa ona tuli lona fa’asalaga e iva masina i le to’ese ina ua fa’amaonia lona moliaga o le saini fa’amalosi o suafa o ni tagata se to’alua na talosaga ai ni ana nonōgatupe se lua na maua i le auaunaga a le S.P.B.D poo le South Pacific Business Development o se auaunaga tuma’oti i Samoa o loo faia ai nonōga tupe mo pisinisi lāiti lea e tele ina fa’aaoga e fa’alapotopotoga a tinā ma tama’ita’i i nu’u ma afio’aga.

O le nonōgatupe muamua na maua ai e Rapi Junior Tu’ipine Saurapi le$4,100 tālā, ma le nonogātupe lona lua na ia maua ai le $10,000 tala. Sa faia lea gaioiga e lē ua molia ma faasalaina a’o galue i le SPBD, ae sa talosaga i le fa’amasinoga lea auaunaga sa galue ai Rapi ina ia faia se isi fa’asalaga ae lē o le falepuipui.

Na mafua lea talosaga ona o taimi uma e aga’i atu lē ua molia e totogi le aitalafu e fa’atoese ai pea ma faamaualalo i le pulega o le SPBD.

Peita’i, i le iloiloina o le faai’uga a le fa’amasinoga, e ui sa fa’atāua le augani atu a le pisinisi nonōtupe, sa fa’atāua le ogaoga o le solitulafono ma faia ai le faai’uga e talafeagai le nofosala i le falepuipui.

Ua tuli nei le faasalaga e iva masina i le falepuipui o lea tama talavou ae ua fa’ailoa i fa’amaumauga a le fa’amasinoga i lana fa’aiuga, ua faamautū nei i Niu Sila le to’alua o Rapi ma lana fanau e to’alua na manuia i le se’i o le nofomau i Aotearoa.

E fā ona moliaga na fa’amaonia ma o se taimi muamua lenei ua tula’i ai i le fa’amasinoga i se solitulafono.