A’o lumana’i ai nei le Aso Sā le ulua’i aso o le masina fou o Novema e amata ai le tau o afā ma matagi malolosi se’ia oo ia Aperila o le tausaga fou 2027, ua fa’ailoa lautele ai nei e le Ofisa o le Va’aitau i le Matagaluega o Punaoa Fa’alenatura ma Si’osi’omaga se tala lata mai o tulaga o le tau, ma ua valo’ia ai le aofa’iga e tasi i le tolu afā ua uma ona fa’aigoa e ono aga’i mai ma a’afia Samoa poo le pāsia foi o le tatou atunu’u.

O le tasi o afā ua valo’ia le ono oo atu o lona malosi i le vaega 3 poo le category 3. Ua aumai ai le fautuaga i lo tatou atunu’u i le tatau ona tapenapena i le faia o gaioiga uma mo le puipuia o meatōtino aemaise o laoa ma maota ina ia mautinoa ai le puipuia lelei o le saogalemū, e lē gata o ia afā ae o ni timuga mamafa e tutupu mai ai ni lologa ma tafega.

O se fa’amanatu tāua mo o tatou tagata ina ia mata’itu i taimi uma tala o fautuaga fa’atatau i uiga o le tau, ao latalata ai ina mae’a lenei tausaga lea toe lua masina taunu’u ia Tesema e fa’amavae atu ai i le tausaga 2026.

O uiga o le tau ua fa’aigaoina o le Elenino o loo iai le va’ai mamao e a’afia ai pea Samoa se’ia oo atu i le tau amataga o le tausaga fou 2027, ma e pei ona molimauina talu mai le masina o Iulai le itiiti poo le leai foi o ni timuga e palasi, malosi mūgalā ua matūtū ai le ‘ele’ele ma ua fa’aitiitia ai foi le suavai maua.

O le tasi lea o fautuaga o loo aumai e le Ofisa Va’aitau o le fa’aaoga ma fa’asoa tatau le suavai o loo maua i le taimi nei. O loo lapata’ia foi le atunu’u i le so’ona faia o tafuna’i ma mū o le vaomatua ona oni galuega ia fa’aeteete i le so’ona faia o ia tulaga ina ia taofia ai ni mū tetele e a’afia ai le vaomatua ma fa’atāma’ia ai la’au o le vao aemaise o la’au tau fa’atoaga.