A o tālia ai nei i se taimi o le tau amataga o le tausaga fou 2026 e tufatufa ai le taui tupe e 10 miliona tālā mo tagata ma pisinisi uma i le itumalo o Safata ma Siumu, ua faailoa e se alii Polofesa o le tulafono i totonu o Niu Sila e ao ona toe iloilo ma silasila ane i le ono tatau ona iai se sao o le malo o Peletania i le taui mo tagata o afio’aga ua aafia le tulaga sologa lelei o le soifuaga masani ona o le goto o le manuao o le Manawanui i ogasami o ia itumalo i le motu o Upolu.
Ua faailoa e le alii polofesa o le tulafono ia Paul Myburgh i le vaega o a’oa’oga faatekonolosi i le iunivesite o Aukilani, o le galuega su’esu’e na faia e le manuao ma lona auvaa i le ogasami i Saute o Samoa e iai le māfua’aga, ona o se mana’o o le malo o Peletania sa faaui atu i le malo o Niu Sila.
Faaalia e le alii polofesa i se lipoti a le leitio faavaomalo a Niu Sila, o le puipuiga o le saogalemu o le fono a Malo o le Taupulega sa talimalo ai Samoa aemaise o lea vaega o Upolu sa faamautū ai le Tupu o Peletania o le faaaao o Malo o le Taupulega e fesoota’i i le su’esu’ega sa faia e le Manawanui.
I lea lipoti ua faailoa ai foi i faamaumauga ua faalaua’itele mai le malo o Niu Sila, e na o le 10 miliona tālā Samoa le taui tupe na mana’omia e le malo o Samoa.
Ae i le faailoa ai e lea polofesa o le tulafono o aafiaga o le malo o Peletania i le galuega sa faia i se vaega o ogasami o le tatou atunuu ona o le itu i le puipuiga, ua faaalia ai e Dr Iati Iati o le iunivesite a Vitoria e iai ona tomai faapitoa i le itu i le puipuiga, e tatau foi i le malo o Peletania ona iai sona sao i le tuuina atu o se taui i tagata ma pisinisi o nuu ua aafia ona o le goto o le manuao o le Manawanui i gataifale o Tafitoala i Safata.
O le vaiaso ua mavae na faailoa ai e le ta’ita’i o le malo i le Palemia, susuga Laaulialemalietoa Leuatea Polataivao Fosi le tapena ai o le feiloa’iga mulimuli a le komiti a le malo ma tagata o pisinisi i nuu i Safata ma Siumu a o le’i amata ona tufatufa le taui tupe e sefulu miliona tālā.
