E oo atu i le 3000 lita le telē o le suāuu o le tiso na gaoia mai se tasi o pisinisi i Rangitīkei i Marton.
I ripoti a le leitio faavaomalo a Niu Sila, o loo su’esu’eina e leoleo lea matāupu, ma na faamauina na tula’i mai lenei gaoiga i le vaevao o le Aso Lua o lenei vaiaso pe tusa ma le 20 minute e te’a ai le itula e 4 aga’i atu toe 10 minute i le 5 o lea taeao.
Faaalia na logoina atu lo latou ofisa i le matāupu poo le itula e 8 o lea lava taeao, ma faailoa atu le aafia ai o se nofoaga o loo teumalu ai suāuu e ni ‘au gaoi.
Faamanino e le sui o leoleo, Sergeant Wayne Sandbrook e to’alua alii na aga’i atu i lea nofoaga i se loli o iai se vaega e mafai ona utu ai i totonu suāuu poo se fuel trailer i le gagana Peretania, faapea kalone.
Ta’ua i ripoti le telē o aafiaga ua iai le pisinisi talu ai le telē o le suāuu o le tiso ua gaoia.
Faamauina le taumafai o ē o loo aafia i le matāupu e faatino gaioiga e pupuni ai i latou mai le maua e leoleo, ae na faailo e le auaunaga lo latou galulue e sa’ili faamaumauga e tusa ai ma i la’ua o loo aafia.
Ua tuuina atu foi i tua e leoleo se talosaga i le lautele mo se fesoasoani e sa’ili le itu o iai le loli na faaaogāina i lea gaioiga solitulafono.
Puna o Faamatalaga: https://www.nzherald.co.nz/nz/police-investigate-3000-litre-diesel-theft-from-marton-fuel-tank/7R6D4SKFN5E5DDRCBRNZM5TJXY/
