O le masina o Aokuso ua fuafuaina e tatala aloaia ai le fale suesue mo faamai e pei o le kanesa o le porosetate (prostate) lea e aafia ai le itupa o alii ma kanesa e aafia ai le itupa o tina e pei o le kanesa o le susu ma isi.
O lenei fale suesue o se tasi lea o atina’e o loo fesoasoani mai ai le Malo o Ausetalia i le faatupeina o masini o le a faaaogaina i nei suesuega.
Na faailoa mai ai e le sui o le faalapotopotoga le Susuga i le Faafeagaiga ia Asalele Lefauaitu i lenei fuafuaga.
“Ua mae’a ona tatala le tele o masini nei na agalelei mai ai le Malo o Ausetalia e faatupe ma ua mae’a install foi e nai alii mai Fiti poo inisinia e iai le tomai i le faaolaina o nei masini.
“O nei masini e fai lava si telē o le aogā, e pei ona silafia o masini muamua nei i Samoa ma le Pasefika ua mafai ona faia ai lava suesuega ma siaki ai o tatou tagata pe a faapea e maua o aafia i faama’i nei.
“Manatua foi a faapea e fai sau siaki e saili ai poo e maua i le kanesa pe leai e ta’i fia masina o faatali se lipoti ae mai lena taimi o faatali ai o la ua faatupulaia le faama’i ia te oe ma oo ai i se tulaga tigaina ma maliu ai.
“Ae o le fale suesue lenei e vave ona siakiina, maua le lipoti ma togafitia loa.
“O lea e fiafia foi ma faafetai ai i le Malo o Ausetalia mo lenei fesoasoani i le silasila i le soifua maloloina ma le soifua manuia o nai o tatou tagata auā o nei masini e anagata e le taugofie ma e ao foi ona teumalu lelei ina ia umi ona aoga.”
I se faamatalaga mai le Saienitisi Sinia o loo galue ai mo le faaaogaina o nei masini Josese Mailulu, o nei masini e fesoasoani foi i le auaunaga a le falesuesue a le falemai tele i Motootua pe a iai ni tulaga faaletonu o masini o loo iai.
“O le a galulue faatasi foi ma le Matagaluega a le Soifua Maloloina i tulaga e manaomia ai le fesoasoani pe a iai ni tulaga faaletonu i masini o loo iai i le fale suesue.
“E pei ona iai i faamaumauga a le Sosaiete o Kanesa i Samoa, o le toatele o tina ma tamaitai o loo oo atu i le sosaiete ua tuai poo ua lē toe aogā ona togafitia ae o lea ua iai lenei fesoasoani tele ina ia vave ona iloa ai ma togafitia loa.
“O le auaunaga lava ia a lenei faalapotopotoga ina ia oo atu i tua i le mamalu lautele e tuuina ai le feau ia fai siaki e iloa ai poo tumau le soifua maloloina o tatou tino pe ua iai foi se suiga.”
