Ua faalauiloa mai nei le lē toe mafai ai e se tagata ona toe aga’i e teu se tupe i teugatupe mo se isi tagata. 

Ua amata faatino lea tulaga e faletupe tetele i totonu o Niu Sila e aofia ai le faletupe o le ANZ ma le Westpac.

Ta’ua e le ANZ o loo mafai pea e a latou paaga ona faaaogā masini talatupe ma masini e teu ai seleni, ma auala faatekonolosi o le transfer o seleni online; ae na o a latou lava teugatupe ma teugatupe o loo iai le faatagaga e latou te faatinoina. 

Mo le Westpac, e ta’ua o le a tāpā le card a le tagata e faatino ai le teuina o seleni i ATMs e amata atu i le masina o Iuni o le tausaga fou.

Ua faamanino mai, o le aga’i o faletupe e faia lea tulaga ona o le mata’itūina o tulaga o auala faatekonolosi, ma fuafua e tali atu i auala faaālātua e pei o money laundering, a ia faamausalī le savalia e tagata o ta’iala ma tulafono e tetee atu i nei faiga faasolitulafono. 

Ae ua faaalia e le to’atele le lē talafeagai o lenei suiga, ma ua ta’ua e to’atele tagata e faalagolago mamafa i tupe o loo latou taulimaina poo cash on hand, ma o le to’atele o tagata matutua e latou te lē faaaogāina auala faatekonolosi ma le tele o masini talatupe ma o le a faigatā ia i latou ona faatino ia suiga ua oo mai.
Mo le faletupe o le ASB, o loo iai pea auala e fesoasoani ai i tagata lautele, ma o loo faataga lava ona faia e nisi o teugatupe mo isi, e faaaogā ai se ID.

Puna o Faamatalaga: https://www.rnz.co.nz/news/business/564212/why-you-can-t-deposit-cash-into-someone-else-s-account-at-the-bank