Ua avanoa nei le tofiga o le Ofisa Sili poo le Faatonu Sili aoao o le Matāgaluega o le Soifua Mālōlōina ina ua faamavae le susuga Aiono Dr Alec Ekeroma ona ua sauni e tauva i le palota tele mo le nofoa o le itumalo o Aana Alofi 2, lea sa tula’i mai ai le susuga Aiono Tile Gafa o loo toe sauni e tauva i le fu’a a le vaega faaupufai e puipuia aiā tatau a tagata.

O Aiono Dr Alec Ekeroma o le a tauva i le fu’a a le vaega faaupufai o le Faatuatua i le Atua Samoa ua Tasi, faapea le isi sui tauva o lea lava pati faaupufai o le afioga Ape Leulumoega Sofara, o se tamalii o lona tuaa tamā le afioga Nonumalo Sofara sa avea ma sui Faipule o le Palemene ma o se tasi sa avea ma fofoga fetalai.

Ua mae’a ona momoli ia sui faaolioli mo le tofi faipule o Aana Alofi 2 i le Faatuatua i le Atua Samoa ua tasi.

Ua faailoa foi e lea vaega faaupufai le momoli atu o se sui tauva tamaitai mo le tofi faaolioli o le itumalo o Faleata 2, o le afioga Muaaufaalele Mary Faafouina Taeu.

O le itumalo lea sa tula’i mai ai i le tofi faipule le tofa Leatinuu Wayne Sooialo o se tasi o minisita o le malo tausi, ma o le a tauva i le fu’a a le pati faaupufai o le Samoa Ua Potopoto le Samoa Uniting Party.