Ua faailoa mai nei i se iloiloga i taumafaiga a sui o loo auai i a’oa’oga i le avea ai ma malu o le malo poo le Police Recruit i Niu Sila nei, ua faamauina ai le telē o se faaletonu o tulaga o iai nisi o faataatiaga i polokalame. 

I se iloiloga faalotoifale a suetusi poo le internal audit na maua ai le oo atu i le 128 sui poo recruits na le’i pasi su’ega i le gagana Peretania poo le English test, ma le to’a 17 o recruits e le’i ausia aiaiga, e le’i pasi foi taumafaiga i le iloiloina o le malosi poo le fitness test; e aofia ai ma gaioiga na solia ai aiaiga o iloiloga.

Ta’ua i lipoti o le faanoanoaga tele, o le mafai e i latou na solia ta’iala ma e le’i pasi foi su’ega, ona faaauau pea le auai i a’oa’oga i le Kolisi o A’oa’oga Faaleoleo poo le Police College.

Talu ai le tula’i mai o nei faafitauli, ua faamanino mai e le Komesina o Leoleo, ia Richard Chambers, le taofia ai o nisi o faatinoga ua ta’ua o le discretionary exemptions, o lona uiga o le faia o se faai’uga e tusa ai ma lona iloa o le tagata ma le tulaga o iai e ui ina aafia i ni tulaga faaletonu.

Ae ua faailo e le Komesina o le a ia mata’itūina lelei le savalia ma le faaaogā tatau ai o aiaiga ma ta’iala ua mae’afaataatitia, ma e lē tatau lava ona toe ‘alo ese ai sui uma o loo faatautaia a’oa’oga o sui o loo ulufale atu e avea ma malu o le malo. 

Ae ua tuua’ia e le Minisita o Leoleo ia Mitchell le faigāmalo na tula’i mai talu ai, e faapea o le mana’o tele o le faigāmalo tuai ia vave le faatautaiga o polokalame faalea’oa’oga a leoleo ua lē lelei ai le faatinoga o tulaga e tatau ona fai mo le maua o ni tagata e talafeagai ma lelei e faatinoina galuega a malu o le malo.

Puna o Faamatalaga: https://www.newstalkzb.co.nz/news/national/police-review-finds-128-recruits-failed-english-test-fitness-standards/