Ua lipotia mai nei le faalauiloa ai e le St Johns o a latou tau fou mo nisi o tagata lautele o taavale falema’i poo ambulances.

Faamauina o lenei tau e mo nisi o valaau e oo atu ia i latou. 

Ta’ua i lipoti mai le leitio faavaomalo a Niu Sila, o le aso muamua o le masina fou ia Iulai, o le a amata aloa’ia ai lea siitaga fou i tau.

Ma o le tau fou o le a iai e $125, $27 tālā Niu Sila ua sii ai mai le tau tuai.

Faamanino mai o lea tau, ua faaigoaina o le part charge, o lona uiga o lea tau o le a faatulaga lea mo nisi o ma’i o loo feagai ma faafitauli mata’utia, poo sē o loo feagai ma faafitauli ma e tugā aafiaga, e pei o se faata’ita’iga o le stroke, tigā tutui le fatafata ma le tau puni o le mānava, ma tagata na aafia i ni faalavelave faafuase’i e pei o le togafitia o se tagata na aafia i se mū ma sē ua gau sona aao se’i tulou.

A ua valaau atu mo se taavale falema’i le 24 itula talu ona tula’i mai nei falavelave. 

Faaalia e le sui o le St John ia Hato Hone ua vaaia le siitia maualuga o le numera o tagata e faaaogāina le auaunaga ma ua vaaia foi le maualuga o tau o le mata’itūina lelei o le faatinoina o lenei auaunaga ma o lea ua tatau ai ona fai se siitaga i le tau mo le faaaogāina o taavale, ina ia mafai ona o latou faaauauina le vaaia lelei o meafaigaluega.

Na saunoa atili se tasi o sui o le auaunaga, o loo latou silafia lelei le tulaga ma’ale’ale ua iai nei le to’atele o aiga ona o le taugatā o le soifuaga.

Ua fautuaina ai aiga e taga’i i le tasi o vaega o le auaunaga poo le annual membership e laitiiti le tau nai lo o le faaaogā o le part charge i se valaau e tasi.

Puna o Faamatalaga: https://www.1news.co.nz/2025/06/16/st-john-ambulance-charge-increasing-from-july/