E to’afā ni tagata ua taofia nei e leoleo, ona o lo latou ave faamalosi o se taavale i le aoauli o le aso ananafi. 

Ua faamauina i lipoti mai leoleo o le Counties Manukau, na lipotia atu i lo latou ofisa le gaoia ai o se taavale.

Ma o lea na aga’i ai loa le sa’iliga a malu o le malo, faatasi ai ma le fesoasoani a le latou vaalele – le helikopa Eagle, e mata’itūina lelei le itu o loo aga’i iai le taavale. 

Ua ta’ua e le’i tuliloa e taavale a leoleo le sa gaoia, peita’i na faatino gaioiga a leoleo e ala i le taumafai e faapā pa’u o le taavale i le faaitu o le Great South Road e lata ane i le Reagan Street.

Sa iai le talitonuga o le a tu le taavale peita’i na aga’i pea lea taavale.

I faamatalaga mai leoleo, e le’i umi lava ona faatino gaioiga i le taumafai ai e taofi le taavale, ae taia loa e le taavale lava lea e tasi se isi taavale i le magafā i Great South Road ma le auala o Cavendish Drive.

Na sosola ese le aualii na gaoia le taavale, ae na tuliloa atu lava e malu o le malo nei alii ma taofia ai loa. 

Faamauina e le’i iai ni aafiaga tugā na aafia ai lē sa tauaveina le isi taavale ae taia loa e le taavale na gaoia.

Ta’ua foi e le’i iai nisi na aafia i le faalavelave. 

O loo faasolo su’esu’ega a leoleo i lea matāupu ma o loo iloilo foi moliaga e molia ai i latou nei e to’afā.