E 48 tausaga le matua o Faatamo’e Tanuvasa e aumau i Melepone i Ausetalia, ua ioe i le solitulafono o lona faaulufale mai i Samoa nakoti, le laau faasāina o le maruana, lea na maua o fafao i lana ato laititi sa fusi i lona sulugatiti.

Faaalia i le faai’uga tusitusia a le Faamasinoga Maualuga e tusa o tolaulauga a leoleo, na taunuu lē ua molia i le malaevaalele i Faleolo i le aso 21 o Fepuari i le faamoemoe e auai i se matāupu tau faamasinoga a lona aiga.

Peita’i ina ua maua o ia faaulufale mai nakoti sa nofo taofia ai loa i le vaaiga a leoleo mo po e sefulu.

O lona ioeina o le solitulafono sa finau ai loia a leoleo e tatau ona faia se faasalaga faafalepuipui e 12 masina, peita’i o le silasila a le faamasinoga e itiiti nakoti na maua ia Faatamo’e e na o le 0.88 kalama le mamafa o maruana ma sa nofo taofia foi mo le sefulu po, ma ua talafeagai ai se faasalaga e lē o le falepuipui.

E 100 itula ua galue fua ai mo le lelei o tagata lautele ma le tasi le afe tala na te totogi o le tau o le faamasinoga.

Ua faafetai ai le Faamasino le afioga Leiataualesa Darrel Clarke i le galuega a leoleo ma le ofisa o le tiute o loo leoina tuaoi o le atunuu e lē gata i le malaevaalele ae o uafu faavaomalo, ua molimauina le tūtū aai e mata’itū tagata malaga o loo ulufale i le atunuu ma aumai ai ma nakoti poo fualaau faasāina.

O le faasalaga ua faia mo Faatamoe Tanuvasa ua aiaia ai e faato’ā ave iai lona tusifolau sa taofia e le faamasinoga pe a mae’a tuli le selau itula faigaluega fua, ma totogi le tasi le afe tālā.