A o tālia ai le aso e faalauiloa ai ta’iala o fuafuaga e finau ai le pati faaupufai o le Samoa Uniting Party poo le Samoa Ua Potopoto, o lea ua amata ona faailoa lautele i faasalalauga a lea vaega faaupufai i lana upega tafa’ilagi nisi o ona sui faatutū mo le palota tele.

O le itumalo o Siumu o le a tauva ai le tofa Tuu’u Ekiumeni Fau’olo sa avea ma faauluuluga o galuega tau inisia a le faalapotopotoga o le malosi faaeletise.

O le a finau o ia i le nofoa sa tula’i mai ai le tofa Tuu’u Anasii Leota o le vaega faaupufai o le Faatuatua i le Atua Samoa ua Tasi.

Photos: Samoa Uniting Party

O le nofoa o le itumalo faapalota o Falealili 1 o le a finau mai ai le tofa i le Taulauniu le fetalaiga Tumanuvao Vaeila Pualele Fui.

O le afioga Toelupe Poumulinuku Onesemo o le Faatuatua i le Atua Samoa ua Tasi sa tula’i mai i le tofi o lea itumalo.

O le nofoa o le itumalo faapalota o Gagaifomauga 2 o le a finau mai ai le tofa So’oalo Maua’i Kuresa So’oalo, o ia o loo avea ma Pule Sili o le Pulega o Uafu a Samoa.

O le afioga Foisala Lilo Tuu Ioane o le Faatuatua i le Atua Samoa ua Tasi sa tula’i mai i le tofi o lea itumalo.

O le nofoa o le itumalo faapalota o Vaimauga 1 o le a finau mai ai le afioga a Tofele Seufale Fataalii Milovale Moke.

O le itumalo lea sa tula’i mai ai le afioga Sulamanaia Fetaia’i Tauiliili Tuivasa o le vaega faaupufai e puipuia aiā tatau a tagata.

I le itumalo o Lefaga ma Faleaseela sa tula’i mai ai le tofa Masinalupe Makesi Masinalupe o loo lagolago i le Faatuatua i le Atua Samoa ua Tasi, o lea ua sii le aao o se tamaitai e tauva mai ai i le fu’a a le Samoa ua Potopoto, o le afioga lea ia Tusanilefaiaao Luasamotu Tusani Nuusa.

O se tasi lea o sui tauva tamaitai ua faaopoopo i isi sui tamaitai o lea pati faaupufai o loo avea ma minisita o le malo tausi e toe tauva foi i le faigā filifiliga aoao a Samoa, o i la’ua ia le tofa Matamua Seumanu Vasati Sili Pulufana, ma le afioga i le Sa’o Faapito afioga Fiame Naomi Mataafa.