E lē tau faailo le māfua’aga o le faatino ai o se ifoga.
O se tū ma le aga i fanua a Samoa e faatino pe afai ua ogaoga lava se gaioiga a se tasi ua faia faasaga i le isi uso a tagata, e pei o le fasioti tagata.
O se tu ma se aga faasamoa ua au tausagā o faatino mai pea, ma o le amataga o lenei masina na molimauina ai le faatautaia o se ifoga a le asosi o Malisi Niu Sila mo se tasi o tinā e suafa ia Moeapulu Frances Tagaloa.
O se faatinoga e ala atu ai so latou faatoesega ona o soligatulafono o se tasi o sui o Brother Bede (Fitton) na faia faasaga ia te ia.
I tala’aga o lenei matāupu, i le faatautaia ai o su’esu’ega i matāupu o sauāga faasaga i fanau Abuse in Care Royal Commission of Inquiry i le tausaga e 2020, na tuuina atu ai le molimau a Moeapulu.
Ma o lea na māua ai loa le faasolo o su’esu’ega i matāupu i le tele o fanau sa i lalo o le vaaiga a le setete ma faalapotopotoga faalelotu mai le tausaga e 1950-1999.
I lea foi matāupu, na faaalia ai le lē fiafia o Moeapulu ona o le lē lelei ona faatautaia ai e le to’atele o ana tusi faaseā ma talosaga mo lea matāupu i le tele o tausaga.
Ma na iai lava lona manatu e leai lava se taunuuga o lea matāupu ona o le faatamiloga sa fai ai e i latou na faatinoina lea matāupu mo le tele o tausaga.
I le ifoga na faatoese ai sui o le Marist Brothers i Niu Sila nei i le tama’ita’i o Moeapulu ma lona aiga ona o sauāga matagā na fetaia’i ma ia.
Na talia e Moeapulu le ifoga, ae na faaleo pea e le tama’ita’i ona tigā i le tele o lu’itau na feagai ma ia i le taumafai ai e fai lana faaseā, i le umi ona faataamilo mai, a o talavou lona tagata se’ia pā’ia mai le taimi nei.
Ae ui i lea ua taunuu lenei faamooemoe, ma o se laasaga fou lenei, ma o se laasaga tāua ia maua ai le filemu ma maua ai le agaga faamagalo.
