O le Hunan Provincial Agricultural Foreign Economic Cooperation Center ua amanaia lo latou sao tāua e ala i suesuega faasaienisi ma le faatekonolosi e tusa ai o nisi tomai faaneionapo auā le faatinoina o atinae i faatoaga ma mea fafaga.
E pei ona faailoa i faamatalaga a le itulau S.C.A.T.A.P. poo le vaega o loo nafa ma fesoasoani i metotia ma tomai tau faatoaga ma mea fafaga, o nei tomai faaneionapo e aofia ai ni masini e faafailele ai moa, o masini mo le gaosia lelei o meaai mo lafumanu aemaise o masini e faaaogāina lea i nisi o fualaau’aina.
Na auai ai le Minisita o Faatoaga ma Faigafaiva, Afioga Laaulialemalietoa Leuatea Polataivao Fosi Schmidt aemaise o le Amepasa o Saina i le fonotaga e iloiloina ai tulaga o galuega faatino mo le agai i luma o lenei vaega o atinae a le atunuu.
Na faafetai ai e Laauli e fai ma sui o le Malo e tusa ai o le lagolago pea a le Malo o Saina i vaega o atinae o faatoaga ma lafumanu.
O nei vaega e tolu o loo fesoasoani ai i latou mai Saina o nisi nei o vaega tāua i le tulaga o galuega mo le atinaeina o mea fafaga ma faatoaga i le atunuu.
O itu tāua nei e aofia ai le latalata i le 30,000 moa o loo tautuufua e faaaogā ai masini e faafailele ai, gaosia i le 200 le mamafa o taga meaai mo mea fafaga aemaise le 2000 o fatu fualaau’aina sa faalauiloa ai nei tomai faaneionapo i le silia ma le 200 faifaatoaga i le atunuu.
