O le tamaitai lalelei o Shane Tormes mai le Atu Filipaina, lea o loo tauaveina nei le pale o le Miss Global 2022, o le a asiasi atu i Samoa i le mașina o Setema, e pei ona faamaonia i se pepa o faamatalaga mai le Vodafone Samoa.

O le aso 12 Setema lea ua fuafua e taunuu ai le Miss Global i Samoa, ma o le aso lava foi lea e taunuu faatasi atu ai ma se sui o le faalapotopotoga a le Miss Global Organization mai le USA.

O le malaga atu a le Miss Global o le talia ai o se valaaulia mai le Vodafone Samoa.

O Shane Tormes na manumalo ma faapaleina i le Miss Global 2022 i le po na fai ai le filifiliga faaiu o lena tauvaga i le aso 11 Iuni 2022, e pei ona sa faia i Bali, i Indonesia.

O Shane Tormes, o ia se uluai tamaitai Filipino ua ia manumaloina lenei pale faavaomalo, faatasi ai ma le isi ona faailoga na manumalo ai i le Best Talent.

O ia o se tamaitai pese a Filipino, o se model ma o ia na manumalo o le beauty queen mai Atimonan, Quezon i Filipaina.

O le masina o Tesema i le tausaga talu ai, na maliu ai le tina o Shane i le kanesa, o le pogai lena na matuā tuu atoa iai tapenaga a Shane ina ia mautinoa e manumalo i le pale o le Miss Global, o lana meaalofa lea mo si ona tina, ma o lea na taunuu lava ona moomooga.

Ma i le taimi nei o loo galue malosi e uunaia taumafaiga uma e tetee atu i le Kanesa.

Ua faagasolo nei la tapenaga a le Vodafone Samoa mo le faatalia o le asiasi mai o le tamaitai Miss Global, e pei o se faafeiloaiga i tu ma aganuu faa-Samoa, ma feiloai atu foi i le autusitala aemaise paaga autu a le Vodafone Samoa e tatau ona feiloai atu i lenei tamaitai.

O le tausaga foi lenei ua amatamea ai le Vodafone Samoa i le faia o se tauvaga e saili ai se tamaitai Samoa e auina atu i Vietnam i le masina o Novema ina ia tauva i le tauvaga lona 10 o le Global Pageant.

E 75 atunuu o le a tauva ai o latou sui i lea tauvaga tele faavaomalo, ma o lea ua faagasolo nei le lesitalaina o suafa o tamaitai uma e fia auai i lea tauvaga, ma o loo faatino i luga o le initaneti le faauluina o talosaga i le Vodafone.com.ws.

O se tamaitai o le a manumalo e faatupe uma e le Vodafone Samoa lana faigamalaga atu i Vietnam faatasi ai ma isi o le a latou malaga faatasi.

Na saunoa le Pule Sili o le Vodafone Samoa, Rana Bose, ‘atonu o se taimi muamua lenei ua asiasi mai ai i Samoa se tamaitai o loo manumalo ma tauaveina le pale o se tauvaga telē faapenei.

‘O le Miss Global Organization e mulimulita’i iai le tusa ma le 1.3miliona tagata o le kelope aoao i luga o le na o fesootaiga a le Instagram, lona uiga o lenei asiasi mai o le Miss Global i Samoa o le a atili uunaia ai foi le tulaga tau turisi i Samoa aemaise le faalauiloa atili atu i le lalolagi atoa o tu ma aganuu a Samoa’.

O le aso 15 o Setema e toe taliu ai le asiasiga a le tamaitai Miss Global, Shane Tormes i lona atunuu.