Ua amata galuega o le masina muamua lenei o le tausaga fou 2026 i le pulega fou ua tau’aveina nei le faagaioia o le faletalimalo i Mulifanua sa igoa muamua o le Sheraton Samoa Beach Resort.
Ua suia nei le igoa i le Samoa Beach Resort i le pulega a se tasi o fa’alapotopotoga tuma’oti tau tupe a le Malo le NPF, o lo’o umia le tele o sea poo shares o lea pisinisi tau faletalimalo.
O le tausaga na te’a nei na aloa’ia ai le faamutaina o le faigapa’aga a le kamupani o le Marriott International, sa pulea lea faletalimalo i se faiga faapisinisi ma le kamupani o le Mulifanua Beach Resort, o lana meatotino poo le aseta le faletalimalo.
Ua na o le faletalimalo o le Sheraton Aggie Grey i Vaisigano i Apia o loo faipa’aga pea ma le Marriott International il e pulea ma le faagaioia o lea pisinisi faletalimalo i Samoa.
E leo aafia galuega a le aufaigaluega o le faletalimalo i Mulifanua i le fesuia’iga o pulega ua iai mo lenei tausaga fou ua amatalia.
