Ua faailoa ai nei e le ofisa o le malo tele o Amerika i Samoa le taunuu ai o le sui filifilia fou o lea Malo e faamautū i Samoa ma galue ai o se tasi e faauluulu iai lona ofisa, o loo i le vaaiga a le Amapasa o lea malo mo Samoa e faamautu i Niu Sila.

O lea sui fou o Amerika o Daniel Tarapacki na amata galue i le tau lotoa’iga o le masina na te’a nei o Aokuso, ma na fetaui lona amata ai i lona tofiga o le sui o le malo o Amerika ma nisi o sauniga tāua e pei o le faauuga o le faauluuluga fou o le Ekalesia Katoliko i Samoa, ma le faailogaina o le 100 tausaga o le taaloga lakapi i lo tatou atunuu.

Faaalia i se pepa o faamatalaga sa muamua galue o ia i ofisa o lona malo i le atunuu o Myanmar, Ausetalia ma Saudi Arabia a o lei tofia e galue i Samoa.

Ua sui tulaga o ia i le tamaitai o Noriko Horiuchi sa avea ma sui o lea malo i lo tatou atunuu, ae ua toe foi ina ua mae’a le 3 tausaga sa galue ai i Samoa.