Ua faamautu se tasi o fesoasoani a le malo o Iapani a o le’i maea lenei tausaga o galuega, e ala i le tuuina mai o se vaegatupe mo le malo o Samoa e tusa ma le 6 miliona iva selau afe tala. O lea tupe o se foai poo se grant o le a tu’u sa’o i le Pulega o le Suavai le Samoa Water Authority e faatau ai se loli vili vai fou mo le auaunaga a lea pulega.
O le ta’ita’i o le Malo le tama’ita’i Palemia, afioga Fiame Dr Naomi Mataafa ma le Ampasa o Iapani i Samoa o Senta Keisuke na faatinoina le sainiga lima e faamautu ai lea foai a Iapani. O se tasi lea o tautua a le Amapasa o lea malo mo Samoa o le a māe’a lona taimi galue i le aso 9 o le masina nei o Tesema le Aso Gafua o le vaiaso fou.
Ua momoli ai le faafetai a Keisuke i le taitai o le Malo ona o le lagolago atu a o feagai o ia ma galuega a lona malo i Samoa. E ese mai lea foai e tele isi fesoasoani a Iapani sa faamautū ma faatino a o galue le alii Amapasa i lo tatou atunnuu. Ua molimoli foi le faafetai a le tamaitai Palemia i le sui o lea malo ona o le agalelei pea i le atinae o Samoa i soo se vaega o le tamaoaiga o le tatou atunuu.
