O le toa 59 o tagata ua taofia ona o osofaiga a leoleo na maua ai fualaau faasāina o le ‘aisa ma le maruana, o nisi o i latou o loo faailoa i le upega tafailagi a le Matagaluega o leoleo, Falepuipui ma le Toe Fuataina e mai le afio’aga o Moataa.
Ua faailoa ai e se matai o le nuu o lo’o sē’ei i le tofi faipule o le itumalo o Vaimauga 2 le tōfā Lenata’i Victor Tamapua, ua uma ona savalia e le komiti a le nuu aiga o ia tagata o loo molia i le aafia i fualaau faasāina, ma ua faailoa iai le faasalaga e sefulu afe tālā ($10,000) ma le tafi ese ma le nuu pe a faamaonia o latou moliaga i le faamasinoga.
Ua faailoa mai e lea matai o loo faia pea sailiiliga poo ia tagata e mai lo latou afioaga poo nisi o loo nonofo ini aiga o le nuu.
O le masina fou e tutulai ai i le faamasinoga maualuga i latou uma ua molia i solitulafono tau fualaau faasaina lea sa taofia ile maea o osofaiga a leoleo ile masina na tea nei ma le vaiaso ua mavae.
