Ua mae’a le faatasiga e lua aso sa fetufaa’i ai le matāgaluega o faamasinoga ma le faafoeina o matāupu tau faamasinoga ma le aumalaga o le sui minisita o faamasinoga a le malo o Iapani ma sui o le ofisa o faamasinoga o lea malo.
O se faatasiga na amata i le tausaga ua mavae ma ua faalua ona talimalo ai lea matāgaluega a lo tatou malo.
Ua faailoa e le Ofisa Sili o pulega o le matāgaluega o faamasinoga ma le faafoeina o matāupu tau faamasinoga, susuga Papalii John Taimalelagi Afelē e tele matāupu tāua o lea faatasiga e autū lava i le ofoina o polokalame e toe poupou ai olaga o tagata ua faamaonia solitulafono, aemaise lava i solitulafono o le umia ma le faaaogāina o laau ma fualaau faasāina faapea sauāga i totonu o aiga.
O le mae’a o lea faatasiga sa usuia i le faletalimalo o le Taumeasina na faamautū ai le fesoasoani a le malo o Iapani e tauala mai i le matāgaluega o faamasinoga o lea malo i le fausia o se nofoaga i Samoa mo polokalame o le toe fuata’ina o olaga o tagata e faamaonia solitulafono.
O le ‘ava o le feiloa’iga na faatino e le matāgaluega o faamasinoga e faafeiloa’i ai le sui minisita o faamasinoga a le malo o Iapani ma lana usugafono a o le’i faagasolo talanoaga ma fetufaa’iga mo le lua aso lea na mae’a i le afiafi o le Aso Lulu o le vaiaso nei.
