Ua toe taliu mai i Niu Sila le team poo le ‘aulavea’i a Niu Sila sa auina atu i Vanuatu e fesoasoani ai i le aafia o lea atunuu i le mafui’e tele i nai aso ua tuana’i atu.

O le team lea sa misia le fai Kilisimasi ma nai o latou aiga a o iai mo galuega lavea’i i Vanuatu ma ua faafetaia le latou galuega ina ua toe tuvae i fanua.

Na faailoa e lo latou ta’ita’i o Ken Cooper i le RNZ ina ua tuvae i Vanuatu sa faatino le sa’iliga o nisi e mafai ona faasaoina mai fale ua aafia, faatino su’esu’ega i le saogalemu o fale ma tuuina se lipoti i le malo o Vanuatu ma o se galuega e le’i faigofie ma ootia ai le loto ae na toe maua lo latou malosi ina valaaulia i latou i se taumafataga a le komiuniti i le aso tonu o le Kilisimasi ma o se Kilisimasi aupito sili mo latou.

Le vaaia o mafatiaga mai mea na faaleagaina ma soifua na ma’umau peitai sa lagona le mafanafana i le mafutaga ma le komiuniti i le vaitau atoa sa iai i Vanuatu.

Fai mai Cooper e ui ua toe foi mai mo sina mālōlōga peitai e lei mae’a le galuega ma e talitali foi i se isi faatonuga mai le Malo Niu Sila pe afai e talosagaina e Vanuatu.

Puna o Faamatalaga: https://www.rnz.co.nz/news/national/537701/rescue-team-deployed-after-vanuatu-earthquake-welcomed-back-to-nz