O taumafaiga e siitia le atina’e o tagata tafafao maimoa mai i Samoa o se galuega faifai pea a le pulega o tagata tafafao i le faamoemoe autū ia to’atele tulisi e avea Samoa ma atunuu e fia tafafao mai iai, ma faaalu ai a latou seleni, o se lagolago malosi i lo tatou tamaoaiga.
O atunuu Asia e pei o Saina e na o le 6 pasene o tagata tafafao e malaga mai ai peitai e ui ina maualalo lea pasene pe a faatusa i tulisi e malaga mai Niu Sila ma Ausetalia, ae o taumafaiga a le pulega o tagata tafafao i le vaega o maketi e faasalalau Samoa i totonu o Saina ma isi atunuu Asia, ua maua ai e lo tatou atunuu le faailoga taualoa poo se award a le mekasini poo se tusi tau i faasalalauga o le atina’e o tagata tafafao i le atunuu o Saina e ta’ua o le China National Tourism Megazine.
O lea faailoga ua faaigoaina o Samoa le atumotu ua valoia le avea ma nofoaga e aga’i iai tulisi, the emerging island holiday destination award.
Sa iai malaga togipau a vaalele sa aumai ai aumalaga o tagata tafafao mai Saina ma isi atunuu o Asia, peitai na taofia e le malo ona e le’i lava tāpena Samoa.
I le taimi nei e lē o nofoa’i ai le pulega o tagata tafafao e faalauiloa Samoa i Saina ma lea vaega o le lalolagi.
O le polokalame talu ai nei o le Samoa Tourism Exchange e ono pisinisi tau i le faia o feutana’iga o malaga poo Travel Agents mai Saina sa malaga mai i Samoa o latou sui e auai i lea polokalame fetufaa’i o se avanoa e foi atu ai sui o ia pisinisi tau femalagaa’iga ma faalauiloa Samoa i Saina ma isi atunuu Asia.
