Ua valoia e le Peresitene o le faalapotopotoga tuma’oti o le Toomaga mo ē Puapuagatia le sili atu ma le miliona tala o le a maua i le aao foai o ekalesia, o faalapotopotoga eseese i fafo ma Samoa, o le foai a le Malo ma tagata taitoatasi i le leitiofoni saili tupe a le Toomaga na faatino i le Aso Toonai na tea nei.
E mae’a le faamoemoe e pei ona faailoa mai e le Peresitene le faletua o Siliniu Lina Chang ua mafai ona faamaopoopo le 946 afe tala.
E 500 afe le foai a le Malo e pei ona taoto i fuafuaga o galuega o le tausaga faaletupe fou ua amatalia nei, e 56 afe tala se foai mai Amerika e lē o manao e faailoa, e faapena foi se foai tupe e 20 afe tupe Niu Sila, 15 afe tala le foai a le Tasi Market i Niu Sila ma le 30 afe tala o le foai a le faalapotopotoga e ta’ua “E lē saua le alofa’’ i totonu o le Setete o Utah i Amerika.
Na faaalia e le Peresitene o le Toomaga e maeu le talileleia e le atunuu i fafo ma Samoa o le faamoemoe, ma o le agaga faafetai lea a le faalapotopotoga.
O le Aso Lulu o le vaiaso nei e maua atoa ai le aofaiga o le seleni ua maua i le sailigatupe a le Toomaga mo ē Puapuagatia, i le faamoemoe e faatupe ai a latou galuega faalotoifale ona o se auaunaga tuma’oti e faalagolago i le agalelei o tagata, o faalapotopotoga ma ekalesia.
