I le amata ai o aso o lenei masina fou o Novema ma le iai o Samoa i le tau o afā, matagi ma timuga.
O le aso mulimuli o le masina ua alu atu nei o Oketopa na faailoa lautele ai vaaiga mamao o le tau mo lo tatou atunuu i le faasolo atu i le faaiuga o lenei tausaga ma masina amata o le tausaga fou 2024.
E 2 i le 3 afā ua valoaia i le faataamilosaga e tusa ma le 400 kilomita o le Atu Samoa.
O ia afā e ono fausia poo le pasia foi Samoa ae e tasi le afā ua valoaia e ono oo i le tulaga 3 poo le Category Three lona malosi.
O le tau foi o afa ua valoia ai timuga mamafa, lologa, galu maualuluga poo storm surges ma matagi malolosi.
O uiga o le tau ua faaigoaina o le Elnino lea o loo aafia ai Samoa e ono faaauau pea seia oo atu i masina amata o le tausaga fou.
O timuga o le a iai pea i le tulaga e lē tele pe below normal, e mafanafana le ea, ae maualuga pea le tulaga lamatia o le laufanua i le matutu ona o mugala.
